Poslovne vesti - Makedonija

Шест нови општини ќе управуваат со градежното земјиште

Крушево, Кичево, Крива Паланка, Гостивар, Ново Село и Чешиново-Облешево се општините за кои владата донесе одлука со која им е овозможено да управуваат со градежното неизградено земјиште во државна сопственост, информираат од Министерството за транспорт и врски.

Исто така, во финална фаза е постапката за општините Охрид и Тетово.

Со оваа одлука, вкупно 34 општини досега се здобија со правото да отуѓуваат и даваат под закуп неизградено градежно земјиште.

Согласно Законот за градежно земјиште, општините кои ќе ги исполнат предвидените услови можат да ги водат постапките за отуѓување на неизградено градежно земјиште, сопственост на Република Македонија. Овие услови предвидуваат општините да имаат развиено и усвоено годишна програма за управување со државно градежно земјиште; да имаат минимален број на лиценцирани општински службеници; да имаат воспоставен систем за електронско наддавање и комисија за јавно електронски наддавање.

Министерството за транспорт и врски апелира до сите останати општини да ги исполнат соодветните законски услови и да поднесат барања за добивање на овластување за управување со градежното неизградено земјиште, сопственост на Република Македонија, како би можел овој процес целосно да се имплементира.

Со управувањето на градежното земјиште од страна на општините се овозможува комплетирање на целата постапка, вклучително и купување и давање под закуп на градежното земјиште и добивање на градежни дозволи, на едно место.